BADOUIN HOSPITALITY
من أحلى الأشياء اللى أحبها هى زيارة بعض أصحابى البدو اللى غالباً يكونون ساكنين بالمناطق اللى يسمونها (المناطق الخارجيه) مثل الجهراء و الفحيحيل والفروانيه و غيرها ...
على أنهم بدو و دايماً أهل الديره يعلقون عليهم ،لكن عندهم عادة لما الحين وهى إكرام الضيف و اللى لا يمكن تشوف أحد يقدم لك الشاى أو القهوة أو حتى يحط لك الأكل إلا لازم يكون من أهل البيت
ما تشوف عندهم خدام يتختطرفون عليك حلايه أهل الديره و بالأخص حريم الديره اللى يالله من فضلك ما تقدر تشيل أى شى إلا نادت الخدام يشيلونه عنها
ياريت أهل الديره يتعلمون هالعاده و اللى أنا أحب أسميها
عادة السنع
ARABIC TOILETTES
يا ترا , فى أحد يستعمل لما الحين الحمامات العربيه؟
ذاك اليوم , تعجبت من واحد يقول لى إنه ما يعرف يستعمل أى حمام إلا الحمام العربى
ما إنقرضوا؟
وعلى فكره...... ليش سموه حمام عربى؟
THE NEW MUBARAKIYA
أمس رحت المباركيه أتمشى كالعاده كل أول ويك أند من الشهرأول شىء ,أبتدى بالمطحنه و آخذ منها كيس حب حق الطريج
بعدين, أروح حق سوق التمر علشان أحلى ريجى عقب ملوحة الحب اللى تنشب بالريج
و عقب الدبق اللى بالإيد من التمر , أروح حق أقرب محل طيب أرش إيدى بكلونيا و أتبخر
لازم كل روحه للمباركيه , أوقف بسوق الغربللى علشان أشترى قحافى و غتر
بعدين , أروح سوق الحريم علشان أشترى دهن بو فاس و مفاريك
لكن فجأه و أنا بسوق الحريم , إلتفت وراى و إلا محل يديد و مبنى مصبوغ أبيض شحلوه وفيه فترينات و كشخه
رحت جمب المبنى وإلا اليافطه مكتوب عليها
الصراحه
محل روعه و عجيب و فكرته مبدعه إنه يكون بالمباركيه
أنا أقول لازم محلات الماركات تفكر تسوى مثلهم و تفتح لها فروع بالمباركيه
على قولة المثل
عتيج الصوف و لا يديد البريسم
برافو عليهم فيلا مودا على هالخطوه الجريئه
