KLEENEX
فى شى بالكويت و بعد فى دول الخليج محيرنى وايد وايد وهى كمية علب الكلينيكس فى بيوتنا و دواويننا و صالاتنا و غرف نومنا وحماماتنا وحتى بسياراتنا
ليش هالكميه الكبيره من علب الكلينيكس كلها فى مكان واحد؟؟؟؟؟؟؟؟؟؟؟؟؟؟
إذا زرت أحد فى بيتهم،شفت كل الطاولات عليها علب كلينيكس
وإذا دخلت فى ديوانية أحد،تشوف بين كل واحد والثانى علبة كلينيكس
وإذا دخلت الحمام فى أى بيت بالكويت،لقيت على الأقل علبتين أو ثلاث علب كلينيكس
وإذا ركبت السياره مع أحد،تلقى على الأقل علبتين كلينيكس،واحده جدام والثانيه ورا
يا ترا ليش هالطبع الغريب اللى بس نشوفه هنى بالكويت و دول الخليج؟؟؟
posted by Chai-7aleeb @ 5:39 AM
40 Comments:
مطبقين شعار النظافة من الايمان
--------
انا اذا ما اقدر اقعد بمكان مافيه كلينكس ولازم العلبة يمي
مستغرب للحين ما نزلوا كلينكس ماركات هاهاها
تلاقي ناس حاطين كلينكس أرماني
وناس حاطين كلينكس ديور
لا وخشاشي فيلا مودا يسوي تنزيلات على علب كلينكس الكولكشن القديم هاهاهاها
صار فيلم
----------
الحمدالله ال 5 علب للحين اب دينار
يعني المنحة الاميرية 200 دينار
تييب لكل مواطن 1000 علبة كلينس :)
واااااااااااااااي صاج ...بس انت من وين اتطلع هالسوالف انا اقول الاكلينكس بحجمه ياخذ حيز في الصوالين والدوواوين والمكاتب ورخيص ويحطونه علشان ينترس المكان وما تصير الطبله فاضيه وعقب يصفون التباسي (يعني الطفيات) وعقب يجيبون اماعين القروضات ويصفونها حتى ينترس المكان ويصير كشخه وماكو حجه ليش ما عندج عنتيكات( ياختي ماكو مكان) اما بالحمامات والسيايير ياربي بعضهم فيهم الطفاقه بدل ما تسحب اورقه وحده بتغير حمرتها تسحب عشر مع ان النتيجه وحده، وتعال شوف اذا طاح ماي على الطاوله وي وي وي ثلاثة اربع المحارم الي بالقوطي تطلع....ياربي مصرررررف موووو...يعني العملية مو نظافه اعيوني الا قل تدبير وهذا راي بصراحه
FUZZY
لووووووووووووووول
عسا الله لا يقطع عنك الكلينيكس
ترا لا تضحك على موضوع الماركات،بتشوفها يمكن عن قريب
متى المنحه بتنزل بالحساب؟
ناطر أعزم الربع على كباب بالمباركيه
أم الحفيز
إنتى فظييييعه
لازم نسأل البنات و الحريم إذا صج يتعمدون يحطون قواطى الكلينيكس على الطاولات بحجة ترس المكان
شوقتينى بالقروضات
عسا مو حزر؟
كثرة علب الكلينيكس لأن الخشوم عندنا مثل الحنفيات ما توقف من العطاس والحساسية عشان جذى لازم كل واحد يمه علبه مثل ما قال فزى. أول فى بيتنا كنا نحط بس واحد في الصاله، ما قام يوفى معانا . هذا يعطس ياخذه يمه. الثانى يبى يمش إيده ياخذه يمه. آخر شىء قالت الوالده نحط ثلاثه ونفتك
وبصراحه البعض يحط علب وايد بالديوانيات والصالونات لأن الناس ما تحب تقوم علشان تاخذ كلينيكس ، الكل راح يخز لأنهم يدرون إنه يبى ينف خشمه!!!. فمنعاً للإحراج يكثرون العلب!!؟
المنحه راح تنزل يا في رمضان ولا عقبه في نوفمبر. إعزمنا على غبقه
fuzzy
نزلوا علب ماركات تحط داخلهم الكلينيكس. أفا عليك ما يخلون شىء هالفار إيست
هوهوهوهو انا عندك وانا اقولك ....لا يربربون عليك...تترس مكان وبس والشغل كله مزامط وعلى بو ديكور عشتوا،،، اشفيها المنضده خالية؟ دام انها نظيفه!! ولاااااا اذكرك بعد، يطري عليك مفارش المخمل والزري الي قبل يبيعهم محل بالسالمية اسمه "مقامس" اللون الاخضر والذهبي والعنابي والذهبي لازم يحطونهم على الطاولات يعني كشخه ولا بيوت الحمايل يحطون مفارش دانتيل اورغنزاه مع اجياس الاكلينكس مالتهم على بو كشخه
ويقولون ان ماخذينه من الابنان على عزها قبل حق الشوووح . والكلام موصحيح ماخذينه من محل بعاير من عواير سوق الحميدية بسوريا حتى القروضات ياخذونها من شارع مدحت باشا بسوريا بعد.بس اتصدق عاد عليهم اقروضاااااااااات عجيبه نااااااااااااطعه واناواختك
hey dude.. tara u reminded me of Seinfeld :P ur finding things out there sitting every where, and we are all looking at them, with out noticing! hehehe
i will call u seinfeld-7aleeb or jerry-chai ... pick one :D
keep posting ;)
أنا أشوف ان الكلينكس ظاهرة صحية وضرورية على سبيل المثال وليس الحصر:
-أنا وحدة وسواسية ودايما يا غاسلة ايدي يا معاي مناديل ديتول ..خو لازم اتنشف عقب بكلينكس
- كلينا علج وبعد فترة حنجنا عورنا اشلون انقطه لازم كلينكس
-بنصلح الماكياج ..لازم كلينكس
- غبار ..لازم انغطي خشومنا وحلوجنا بكلينكس
- حبينا ناكل سناك ..لازم كلنكس عشان ما ننعفس
- رحت مكان بتقعد على كرسي ..يمكن يطلع مغبر ولا في ماي والا والا سو لازم كلينكس عشان ملابسنا ما اتوصخ
- معانا يهال وكلو كاكاو لازم كلينكس والا يتسبحون بالكاكاو
أنا وحدة أحس بالامان أكثر في مكان في كلينكس
لووووووووووووووووول
بما اني أول واحد علّقت على الموضوع - موتوا حره - فأقول ولا ما أقول ؟ انزين بقول لحد يدز ... عندي طلب من شاي حليب .. تذكر ستيريو بينيتون ؟
اللي فيه شريط كاسيت وكارتردج وفوق اسطوانه ... للحين اذكر الدعاية مالت ستيريو بينيتون .. واحد راكب خيل ماشي 200 وغبره واره يوقف عند بيت شعر هاهاهاها سحب السايد جان ينزل ويشغل البينيتون بس عاد ما أذكر تفاصيل كنت بيبي احم .. نبشلنا على صورة البنيتون شاي حليب :)
وشكرا
Tawni ala7eth hal thahira.. o lama garait ur post la7atht enna in my room there are 3 gowa6i kleenix ! weird
some old stuff for you guys .. ;)
http://www.sixdifferentways.com/gallery/becg/weltrontrio
http://www.wjoe.com/roundweltron.jpg
keep reminiscing :)
3ad e7na ib baitna il 3ax killah mako klinix ,, 25 hrs indwer ..
3ndina taqshouf :P
لوووووول جان زين كلنكس.. يشترون مناديل التعاون إللي تخلي الخشم يقرح .. لا وهل أيام هابين هبة يشترون علب كلنكس على Lv و لا gucci وتلقاه من داخل ماركة الميرة .. حتى بالكلنكس بيتكخشون
الصراحة انا ما استغنى عن قواطي الكلينكس
ويسموني بالبيت بو عطسة
ما امراض
بس النشلة ما تفارقني (:
و حركااااااااااااااات
Do you know why? hehehehhe most of us have a large nose (OLO). Large noses need extera klenex.
السؤال الوجيه يقول: دام إن الكلينيكسات ضرورية بالسيارة، ليش إلى الآن ماكو موضع مخصص لهم؟
بلى تحذف وتدعس وتدوّس
The Simper,
شنو ذيلي؟
I love Klienex I cant live without it.
sabah cola plsI dare you
بس الصراحه اكثر مكان يستهلك فيه الاكلينكس في المواجب الي فيه الهبان يرنع كاااااااااع كع كع
ايييه عااادي بعدك خلق تطلع من الدوانيه اتييب الكلينكس من صاله
والا اطلع من داري اروح الصاله بالليل اييب كلينكس
وااي ما ابي
guys.. where is the blog owner? i guess we lost him!
THE SIMPER
I'm Here checking your comments and will reply shortly.
وسواس الله وكيلك
إذا عطس كلينس
و الحساسية يبيلها كلينكس
و جان واحد سلم لازم كلينكس
شرب ماي يمش بكلينكس
أكل
لا الأكل يمش إيييدة بالطوفة و يقول فامان الله
ههههههههههههههههه
مشكور علي الإهداء!؛
صج صج صج قشيييت من الضحج
بيني و بينك
من بوستك قمت ألاحظ شي
ليييش ثلاث أرباع تيشيرتات الشباب
ARMANI!
EA
GA
A|E
ماكو إلا أرماني بالبلد؟
n'6afah tegdr etgol? ;)
وأزيدك من الشعر بيت
كل اشارة بالكويت عليها واحد يبيع اكلنكس !!
حبيب البي عساك على القوة انشا الله
انا اوافق الاخت حساوية (:
عشان إذا حذفتة ما يعور
وتفش غليلك فيه (:
ازيدك من الشعر بيت
بالسيارة كمان يحطو بالشنطة احتياط عشان اذا خلصت العلبتين التانيه
لوووووول
صاج احنه نتؤضا حق الصلاه و نمش
بعدها في الكلينكس
والفوطه يمنا
احنا ناكل همبروجر ونمش في 50 ورقه كلينكس
احنا نمشى في السوق و ورق الكلبنكس في ايدنا
والله ما ادري ليش
كل هذا نظافه او تفلسف ؟؟
اقول سنعه ولكن
هذه مهي نظافه هذا الوسواس شكوووه لله ولا احد يروح السوق و ابإيده كلينكس!!!ام كلثوم اهو من عرفناه والكلينكس في ايدها داعيه جنها ام نشقه لوووووووول
لا لا لا لا
انا اقولك ليش
بما انه وحيث ان الجو بالكويت ودول الخليج
باااااااااااااارد صيفا
ومثلج شتاءا
فان بذلك معظم الناس يصابون بالنشله
والانفلونزا الشديده
واللي يعاطس واللي يكح
فالكل يحتاج الى كلينكس
والله يعين ملوت النظافه على الكلينكسات
اقول الهوست جاي حليب وينه فيه...؟؟ فاقدته لا خبر لا جفيه لا حامض حلو لا شربت،، ياربي وينه ما يجابل بلووجه الظاهر مشغول ولا قاعد يعد قواطي الاكلينكس الي بفريجهم وبيسوي احصائيه وتحليل حول ذلك ويبي يعرف جم محرمه يستهلك الفرد الكويتي العادي او المنشول او ابو نشقه اظنتي هذا هو سبب غيابه الله يعينه شاقي عمره
ObjecTion !!
امس عيزت ادور كلينكس ما لقيت
!!!!!!!!!!!!!!
فجأة سمعت صوت من السماء يقولي
شوفي كبت ديمة
و اذ بمخزن كلنكساااااااااات
why mom is hiddn it !!
from whome !!
Still a mestery !! to be cont.
;D
so either we're not kuwaitz or mom has a thing against it !!
its better to be clean then sorry :P
سؤال بسيط اذا واحد قاعد ويامجموعه من القوم وياته عطسه وعطس ووماكان مصنوع الكلينيكس جان الناس بدال الغتر يبدلونها بشماغات
ويصير الموضوع عادي ومع الموضع تنقلب افوط
اسف
مع الموضه تنقلب افوط
والافوط جمع فوطه والفوطه هي مايمسح به الوجه والكفين وشكرا
One of my American friends Kuwait said the same thing to me...but she also wondered: "But when it comes to bathrooms, there isn't one single toilet paper." and she continued: "I know you guys use water instead of wiping but still...it's a MUST." LoL
كل الكويتيين يشربون جاي حليب، والجاي حليب غالباً ينسكب على الهدوم والطاولات ويدمر الدنيا، وهنا لزم الكلينكس
يعني انت السبب :)
عسا ما شر وينك؟
عسا المانع خير؟
أعزائى الزوار والأحبه
آسف وايد وايد وايد اننى غبت عنكم
الكمبيوتر أخترب على و تونى الحين قدرت أصلحه
مشكورين على الردود اللى أثبتت لى معزتكم لى وأنكم صج فقدتونى
الله لا يحرمنى منكم
العين الساهره
صاجه وأثبتت الردود أن الكويتيين ما لهم غنا عن الكلينكس
أم الحفيز
دايما أنتى مبدعه
مشكوره وايد على السؤال والحمدلله رجعت لكم
THE SIMPER
THANKS FOR MISSING ME AND THANKS FOR SENDING ME THE PICS OF THE TAPE PLAYER.IT'S AMAZING.I WISH WE HAVE THEM NOW WORKING ON THE I-POD.
TWEETY
معنى كلامك أن ما لج غنا عن الكلينيكس
FUZZY
أنت تآمر يا بعد جبدى
أدور لك البينيتون و راح أسويلك بوست
A DAYDREAMER
GOD BLESS YOUR MOM.
ZALABYA
YOU SEE?????
HONEY
عيل أنتو مو عايشين بالكويت
JIBLA SQUARE
صاج والله
كلينيكس التعاون كله يقرح الخشوم
يعقوبوو
حياك الله بالبلوغ مالتى و ما تشوف شر
ZEIDANI
NOT ANYMORE LARGE NOSES.THANKS TO THE HYPE OF THE PLASTIC SURGERY!!!
MOSAN MOSAN
looooooool
7SAWEYA
هدى أعصابج حبيبتى وعن التحذف
SMILE
مشكور على الزياره و الكسل مو زين
REEMA
يلومونى فيج؟؟؟
ما قصرتى أنك سألتى عنى
بالنسبه حق هبة تى شيرتات أرمانى،هاذى الكويت لى هبو بالشى
بس يا ترا،جم واحده من هالتى شيرتات أصليه و مو صناعة بانكوك؟
والله الواحد هالأيام ما قام يعرف الصج من التقليد
ZIZOTIME
YOU'RE RIGHT.
عادل القلاف
الله يقوييييك
والله يكسرون الخاطر اللى يبيعون الكلينيكس على الاشارات
TALA
مشكوره على الزياره و لازم سبير
CECE DESOUZA
THANKS FOR YOUR VISIT AND KUWAITIS HAVE ALWAYS BEEN VERY CLEAN.
SARAH
SALAAAAAMAT HABIBTI
الأخت سنعه و لكن
مشكوره على الزياره و صاجه أن بعض الأحيان تكون الشغله تفلسف
أحلى حب
مشكور على الزياره و أنت الصاج البرد والحر سبته المكيفات
أحلى أنغ
مشكور على الزياره و الظاهر الوالده شافت مصرف الكلينيكس زاد بالبيت و قررت تخشه عنكم
WILTED-ROZE
THANKS FOR STOPPING BY AND YOU'RE RIGHT.
BARRAK
مشكور على الزياره و يا حلو مشة السنسون بالغتره مرات
FALLEN ANGEL
THANKS FOR STOPPING BY.YOU SEE??? STRANGERS NOTICE THIS HABIT OF THE MASSIVE AMOUNT OF KLEENEX BOXES.
WHITE WINGS
مشكوره وايد
لكن بعض الناس لازم تصك حلجها عدل وهى تشرب الشاى حليب و عن الطياره اذا صار الشاى حليب حار
BALQEES
صاجه والله
يا كره المصر
الحقيقه موضوع مهم جدا و لعلم الجميع لما نعزم أجانب عندنا بالبيت يضحكون علينا في السر لما يشوفون علبة الكلينكس على طاولة الطعام لأن الكلينكس عندهم اسمه تواليت بيبر يعني ورق تواليت يعني ورق الحمام و هم حق طاولة الطعام يستعملون النابكين !
على كل حال أعتقد بأن كثرة علب الكلينكس ناتجه عن ان غالبية الكويتيين مصابين بالحساسيه و لذا ضروري وجود الكلينكس في متناول اليد .مثلا انا لما أروح السوق لازم في وقت من الأوقات أدش محل و أطلب كلينكس !
duke
Post a Comment
<< Home