Thursday, August 31, 2006

POLICE WOMEN


العالم كله عندهم شرطة حريم
حتى هالصورة مأخوذه من شرطة سلطنة عمان
ليش ما عندنا شرطة حريم بالكويت؟

posted by Chai-7aleeb @ 4:06 AM 51 comments

Wednesday, August 30, 2006

ACNE


سؤال نفسى ويمكن تلوع جبد بعض القراء لكن ما عليه،تحملونا شوى

ليش إذا الواحد فينا طلعت له نفره بوجهه يتشوق إنه يفقصها و يبطها؟

posted by Chai-7aleeb @ 5:23 AM 33 comments

Monday, August 28, 2006

RAMADAN PERFUMES

اليوم دخلت على جدتى فى دارها،ولا اهى معتشله و مجابله الكبت اللى تخش فيه الطيب و البخور والكلونيات
سألتها:مساك الخير يمه،شقاعده تسويين
قالت:والله يمه قاعده أزهب الطيب حق اللى راح يزوروننا برمضان
قلت لها:شلون تحطين هالكلونيات حق الزوار،تراهم داثرين و يمكن أختربوا الحين لأن صار لهم قرن عندج
قالت لى:انجب جبك الله،أنت شفهمك بالكلونيات السنعه،خلك بشغلك

يا جماعه شوفو بالله عليكم شنو جدتى مطلعه من كلونيات حق الزوار برمضان










أظن اللى راح يزور جدتى السنه أما راح يحوشه (تنك) أو (ضيق تنفس) أو (حكه بالجسم) من هالكلونيات الداثره

posted by Chai-7aleeb @ 1:52 PM 38 comments

Sunday, August 27, 2006

FIRST IMMPRESSION

سؤال سريع لجميع القراء

لو أنت ريال و مرَت جدامك بنت
شنو أول شىء تشوف فيها؟


ولو إنتى بنت و مر جدامك ريال

شنو أول شىء تشوفين فيه؟

posted by Chai-7aleeb @ 4:45 AM 60 comments

Saturday, August 26, 2006

RAMADAN ADS


رمضان سنة 2004،كل الكويت هبت بدعايات بوراشد مالت كامكو وصاروا الناس الله وكيلكم كلها تتكلم على بو راشد و كلمة بوراشد حتى تكون من ضمن كلامهم و حتى المسجات كلها عن بو راشد


رمضان السنه اللى فاتت،الناس هبت باعلان البنك الوطنى و كلمة (يبيله) و صاروا الناس كل كلمه و الثانيه يبيله يبيله يبيله و المسجات طفحت على يبيله


الله يعيننا السنه الناس شراح تهب في

posted by Chai-7aleeb @ 3:27 AM 30 comments

Thursday, August 24, 2006

LONG WEEKEND

بما إن اليوم يبدى الويك أند الطويل بمناسبة عطلة الأسراء و المعراج،قررت أقضى العطله بالبيت و راح أسوى هالأشياء اللى ودى أشارككم فيها


طلعت من الكبت أحلى مسرحيتين أحبهم وراح أحطهم وأشتغل ضحك عليهم

زهبت علب بسكوت (تك) المالح حق التغمس بالشاى والحليب مثل أيام أول طرشت على خبز إيرانى مسمسم من الخباز بفرع جمعية الدسمه (لأنه أحسن واحد) مع قواطى جبن كرافت التنك

هذا حق أول يوم


واليوم الثانى

قررت أجيب لى همبرغر جبن من (ويمبى) الفرع الوحيد الموجود بالكويت فى جمعية النزهة

يظل أكثر همبرغر لذيذ و يذكرنى بأيام أول


وأخيراً،جبت لى فستق مملح من المطحنه الفاخرة بالمباركيه حق التسليه

عزة الله زدنا 5 كيلوات بهالعطله

كل عام و أنتو بخير


posted by Chai-7aleeb @ 4:36 AM 42 comments

Wednesday, August 23, 2006

HOT NEWS

خبر ساخن جداً

طحت اليوم على فكرة مشروع مطعم مسوينه 3 بنات من الطبقه المخمليه الكويتيه وراح تكون الأطباق بهالفكره المبدعه

تذكروا إنكم أول مكان شفتوا فيه هالخبر بالبلوغ مالتى

بالعافيه





posted by Chai-7aleeb @ 1:52 AM 39 comments

Tuesday, August 22, 2006

DIET CENTRE

هالأيام،ما تدخلون بيت إلا تشوفون قواطى الأكل مالت (دايت سنتر) و الناس هابة فيه بشكل غير معقول على بو إنه ريجيم

كل ما شفت هالقواطى،يطرى على المثل اللى يقول

رزق القطاوه على الخاملات

posted by Chai-7aleeb @ 4:25 AM 36 comments

Monday, August 21, 2006

YEMEN


لا تطيح من عينكم اليمن
ترا فيها ناس كشخه والديره يقولون حلوة و عندهم ما شاء الله خير و طبقه غنيه من المجتمع
بخاطرى أروح أزور أبو بكر سالم فى بيته هناك ونسوى دقدقه
من الأماكن اللى ودى أروح لها لكن الشباب مو مساعدينى

posted by Chai-7aleeb @ 3:10 AM 51 comments

Sunday, August 20, 2006

MY NEW ICE BOX


لا تطوفكم
يا ريت أحد يأخذ وكالتها للكويت
ترا عجيبه حق البحر و الشاليه وتطرش نقصات الميد و الصبور هالأيام

posted by Chai-7aleeb @ 8:16 AM 14 comments

SUNKIST

بعد ما قريت ردودكم و تعليقاتكم على بوست البفك،حبيت أكَمل فرحة القراء وأجيب لكم اللى تبونه و تتمنونه وهو ألذ شىء مع البفك

يا حلو سانكيست مال أول

posted by Chai-7aleeb @ 7:29 AM 18 comments

Saturday, August 19, 2006

BAFAK

يا حلاتك إذا يعت
ويا حلات ملوحتك
ويا حلاتك إذا تقروشت داخل الحلج
ويا حلاتك إذا لزقت فوق باللهات
ويا حلات لحسة الأصابع عقبك
ويا حلات لونك البرتقالى إذا صبغ بالإيد
و ياحلات ريحتك إذا قعدت بالإيد حتى عقب الصابون

الله لا يقطعنا منك و يخليك لنا يا البفك

بمناسبه مرور 50 سنه على إختراع البفك فى إيران



posted by Chai-7aleeb @ 4:39 AM 50 comments

Friday, August 18, 2006

KUWAITI NEWBORN

قبل كم يوم،رحت مع أختى نزور وحده من أهلنا بمستشفى المواساة لأنها والده و حاشنى نوع من الصعقه والأستغراب من هالزياره اللى راح أشرح لكم شصار فيها
أول شىء،الوالده مأخذه سويت رويال و مسويه الله يحفظها ديكور كامل للجناح اللى هى فيه و تلاحظ الديكور من تنزل من المصعد لما توصل غرفتها
هذا غير الورد اللى مرصرص و تارس كل الممر اللى بالجناح
تحس بريحة الورد و البخور من تقرب جمب الغرفه
قبل لا توصل الغرفه،تبتدى تسمع صراخ الحريم اللى مكودين داخل غرفة الوالده و تحس كأنهم قاعدين يتهاوشون مو يسولفون
سألت أختى:ليش هالصراخ؟
قالت:هالحريم بعد قاعدين يسولفون
قلت:ليش ما يسولفون بالعدال،؟ما يدرون أنهم قاعدين بمستشفى؟
قالت:هذا طبع حريمنا

المفاجأه الأولى كانت الوالده نفسها
لو تشوفونها تقولون عروس مو والده
عفيا خلق و باس قوى
قميص النوم مع الروب كأنه بدلة عرس و كاشخه عالآخر
ما تقول أمس هالمره مطلعه ياهل من بطنها

يوم رحت أسلم عليها،بغيت أتعرجب من الشراشف الستان اللى تسحب على الأرض

صج تقول فراش عروس

لا،وبعد تحت الفراش النعال الستان اللى تمشى مع طخم الشراشف و هم الزباله و علبة الكلينيكس و الأكسسوارات كلها نفس الطخم


والألعن من جذى،هالوالده كاشخه بساعه كارتييه الماس و تراجى و أساور الماس كأنها رايحه تسيورة مو والده
دخلوا علينا ستاف فلبينيات كامل لابسين (يونيفورم) واحد و كله كشاكش و مزين تقول يضيفون فى حفله كبيرة مو فى مستشفى يقدمون لنا عصير و شاى بأغلى أنواع المواعين و الصوانى
لكن،صج كسروا خاطرى هالفلبينيات و هم شايلين مواعين وزنها (طن) يفترون فيها على اللى قاعدين و تحس هالحريم يلاحظون كل صغيرة و كبيرة من ناحية المواعين و التقديم و الكاكاو و الورد (كأنهم مباحث) وناهيكم عن النقزات بين هالحريم و هم يدققون بالمواعين

يوم جينا بنطلع،جات أم الوالده و قدمت لنا (بونبونيرات) كتذكار للمولود الجديد وقالت كلمتها اللى لما الحين فى بالى: والله احترنا من المولود اذا كان بنت أو ولد و ما بغينا نسوى لون وردى ويطلع المولود ولد،ولا بغينا نسوى لون أزرق وتطلع المولوده بنت،علشان جذى سوينا لون أبيض

يكون طالعه فيها يعنى ،و موفره مصاريف

ليش يا جماعة الخير كل هالمصاريف و هالمزامط و الشوح بهالمستشفيات عند الوالدات؟

posted by Chai-7aleeb @ 7:45 AM 41 comments

Thursday, August 17, 2006

SU DOKU

هالأيام اللعبه المكتسحه هى

SU DOKU

نصيحة لكم تتعلمونها و أحسن لكم من قراية المجلات بالحمام

نتمنى لكم وقتاً سعيداً

posted by Chai-7aleeb @ 4:56 AM 40 comments

Wednesday, August 16, 2006

THE END OF THE DISHDASHA

آآآآآآآه ه ه عليج يا الدشداشه

غميضه عليج والله اللى هجروك أغلب الرياييل و الشباب و راحو حق الترصرص بالبنطلونات و الجينزات و البلوزات المرصرصه

مو حرام هاللباس التقليدى التراثى ينهجر؟

و بسبة شنو؟

يعنى نبى بسبق الموده و نواكب العالم الغربى؟

ما أقول إلا مالت على الموده و على اللى يضحى بتراثه علشان جينز و تى شيرت



صرنا هالأيام نشوف الأقليه اللى يلبسون الدشاديش و أغلبية هالأقليه من الرياييل اللى بسن متوسط إلى كبير يعنى من 35 سنه و فوق

ليش يا عالم؟؟؟


حتى المساكين أهل الخام قامو يصيحون من الخساير اللى بسبة أغلبية هالناس اللى خلت الدشداشه و راحت حق البنطلون و اللبس الغربى
أما الشباب اللى ظل محافظ على الدشداشه،أغلبهم من فئة البدو و المناطق الخارجيه وقلة قليله من شباب الديره

مو حرام؟

لاحظوا لما تتمشون بالمجمعات راح تلاقون يمكن 90% من الشباب لابسين بنطلونات و الأقليه لابسين دشاديش
صرنا نشوف شبابنا بين يوم و ليله بهاللبس اللى صراحه خزى

بلوزات مرصرصه وفنايل علاق علشان يراوون عضلاتهم

جينزات مشققه

أساور و سلاسل

شعر مصبوغ

موديلات شعر تبتدى من قصة الهرم الى قصة السبايكى

وشم و تاتوو

ليش يا عالم جذى صاروا شبابنا؟؟؟


هل إنتو راضيين باللى تشوفونه بالشباب؟

وسؤال خاص للبنات

شنو برأيكم أحلى،الشاب بالدشداشه أو بالبنطلون؟


posted by Chai-7aleeb @ 4:33 AM 33 comments